Юрташкара спортивни доакъош тоадеш латт
ГӀалгӀайчен юрташка, аргӀ-аргӀагӀа тоадеш латт спортивни доакъош, спортацара болх дӀабахьара дикагӀа дола хьалаш вӀашагӀдохкаш. Иштта Алхастерча Заьзганаькъан урам тӀа хьалъе йолаяьй спортивни комплекс, яхаш, дийцар «Сердало» газетага ГӀалгӀай Республикан Шолжа кхален администраце.
«Цу спортивни даькъ тӀа юртара бахархой таро я шоай могашал тоае воркаут-майдан тӀа, иштта волейбола, баскетбола майдаш тӀа», - дувц хоамо. ХӀанз укх сахьате говзанчаш, болхлой хьалъеш йолча спортивни гӀишлон чӀоагӀа кӀийле еш ба.
Белгалду, хургйола спортивни комплекс-из республикан Кулгалхочо Келматанаькъан Махьмуд-Ӏаьлас юртхошта деш дола совгӀат хилар.
ГӀулакх довзараша яхачох, из гӀишло хьалъяь яьнначул тӀехьагӀа, спорт а физически культура а езараш дукхагӀа хургба.
