ГӀалгӀай къаман
юкъара газет

Кердадараш

Цхьаькха ишкол хьалъяьй вайцига, 540 моттиг йолаш

ГӀалгӀай мехка, «Дешар» яхача къаман проекта чуйоагӀаш, цхьаькха ишкол хьалйир. Керда дешара моттиг лаьрхӀа я 540 дешархочунна, кастлуш Шолжа кхален Эбарга-Юрта цо ший наӀараш хьаелларгья.

«Ишкола хьалъяь моттиг я дегӀайоагӀаш йола кхале, цига социальни даькъера гӀишлош эшаш я. Керда ишкол кийча я болх бе дӀайолаяла. Цига хӀанзле Ӏооттаяьй мебель, хӀанзарча заман гӀирсаш, коа-картарча даькъ тӀара балхаш даьд. Берашцара болх дӀаболабара эшар цаӀ да: каьхаташцара болх йистебаккхар. Уж доацаш оаха цхьаккха а гӀишло хьаэцац. Юкъара хьаийцача, тахан ГӀалгӀайче гӀишлон балхаш дика дӀахьош да, уж лаьгӀде лаьрхӀа а дац», - аьлар мехка кулгалхочо Келаматанаькъан Махьмуд-Ӏаьлас.

Ишкола кхозза вӀаштӀара яь я; дика, сийрда кабинеташ я информатиках, химех, биологех, физиках, доазол арахьара метташ Ӏомадарах дола дешар дӀадахьара. Къахьегама ха дӀаяхьара кӀаьнкашта пхьоалле я, уж цига Ӏомалу аьшкаца, дахчанца дувзаденна балхаш де; иштта цига я кхача кийчбара, барзкъа тегара, ло баккха Ӏомабалара йола кабинеташ, йиӀигаш Ӏомалу цӀагӀа леладу балхаш де.

Ишколе иштта хургья дика хьалаш чудола 160 сага лаьрхӀа автобус, гримёркаш а йолаш, 258 моттиг йола актови зал. Спортаца ювзаенна ха дӀаяхьа таро хургья 432 кв. метр йолча даькъ тӀа. Лифт, лорий оагӀув, салоӀа моттиг я ишкола даькъ тӀа, цудухьа бераш а хургда кхерамзленца Ӏалашдаь, паргӀата.

Лорий оагӀонна чуйоагӀаш я маьхий детта кабинет, лора а медйиший а кабинет, иштта лорий гӀирс кийчбу фусамаш. Из керда ишкол юкъейоалаяро таро хулийтаргья, цу юртара юкъарча дешара кхыйола моттигаш паргӀатаяха.

Электронни газета язле

(PDF) кӀира цкъа арадувла къаман юкъара «Сердало» газет, цӀагӀара ара ца воалаш деша таро я

Хьаязде