Керда автобусаш болх бе йолаяларга хьежаш ба, тайп-тайпарча юрташка баха нах. «Сердало» газета корреспондента техкар, уж автобусаш наькъа ялара йола ха малагӀа я, ше ГӀалгӀай Республикан промышленноста, таьрахьий дегӀаахара министерствон транспортни комплекс дегӀайоалаяра отдела кулгалхочунца Маслаков Константинаца къамаьл деш.

Цо яхачох, вай республике хьакхача езаш я 78 зӀамагӀа йола автобусаш, уж болх бе йолалургья, карарча шера саькура бутт юкъекхоачаш. «ХӀанз укх сахьате, царна эшаш дола каьхаташ кийчдеш, регистраци еш бола болх дӀахьош ба. Цхьадолча боахамашца из болх чӀоагӀбара йола ха эшаш хул. Цу министерствон кара даларе, хьогге а уж араяьнна хургьяр болх бе.

ДукхагӀа социально дӀачӀоагӀъенна маршруташ я оаха чулоацараш, гаьна ядача юрташка бахаш бола нах массаза а цу транспорта раьза хургболаш, иштта республикан кхыча шахьарашца, юрташца цар бувзам лелабергболаш», - аьлар Маслаков Константина.

Керда автобусаш юкъеяларах, нах дӀа-юха кхувлаш йолча транспорта болх аттача баргба, тешамегӀа а хургба.