Соче дӏайихьар альпинистка хиннача Албохчанаькъан Лейлайна Хетаяь ӏаддалхой яхьаш
Соче «Дагомыс» яхача унахцӏенон комплексе дӏайихьар «Лаура: Лоамий кхайкар» яха ӏаддалхой яхьаш. Из кхетаче вӏашагӏъеллар вар «Вайнах» яхача Къаман-культуран центра кулгалхо Малсаганаькъан Аюп. Из хетайир цӏихеза гӏалгӏай альпинистка хиннача Албохчанаькъан Лейлайна.
«Россе цхьоагӏон Шу хилара чуйоагӏаш хинна кхетаче хетайир, цӏихезача российски альпинистканна, шозза Эверест лоам тӏа яьннача гӏалгӏай кхалсага Албохчанаькъан Султана Лейлайна. Моаршал хоаттача дешашца гулбеннарашка къамаьл дир къамий юкъарлон Совета кулгалхочо, «Дагомыс» яхача унахцӏенон комплекса керттерча кулгалхочун гӏончас Чеботарь Константина, Сочи-Шахьара администраце вахара политкан даькъа кулгалхочо Асланов Ильгама, «Сихагӏа, Дикагӏа» яхача дика гӏулакхаш лоаттадеча ганза кулгалхочо Оприц Юле. Из кхетаче хьайийллар яхьаш вӏашагӏъехкача «Вайнах» яхача Къаман-культуран центра кулгалхочо Малсаганаькъан Аюпа. Цо белгалдир, цӏихеза спортсменка дагалацар, Россе халкъа цхьоагӏо, барт чӏоагӏбар лоархӏаме долга. Яхь дӏахьош яр шахьара ветераний Совета зарбан болх лелабу Лукьянова Кристина. Из хьаьшашта духьалъера ший ӏадатий оагӏонаш гойташ бола гӏирс тӏабувхаш, цунца хьагойташ ше уж лорадеш хилар», - аьлар «Сердало» газетага Гӏалгӏайчен Миннаце.
Кхетачен кхоллама дакъа дӏахьош, дукха программаш юкъеяьхар. Малсаганаькъан Элберда, Замирас гулбеннарашта гойтар гӏалгӏай халхар, хӏаьта поэтесса, Кубана йоазонхой Союза доакъашхо йолча Соловьева Людмилас Гӏалгӏайченна хетаяь байташ йийшар. Из кхетаче сийрдаяьккхар шоай ашарашца Сиухина-Невидомская Светланас, «КомпроМисс» яхача дуэта.
Спортивни даькъ тӏа дикагӏа бола толам баьккхар «Сочера белорусаш» тоабо, 15 балл йолаш, дошо совгӏат даьккхар цар. Цхьа балл царел чухьнахьа мара бацар «Дег тӏара мархӏадохк» яхача АНО дото совгӏат даьккхараш, кхоалагӏа моттиг кхаьчар 7 балл болча толамца «Соче эпсараш» яхача тоаба.
Спортивни даькъ тӏа вӏашагӏкхетар хилар Сибарегӏен, Донбасса мехкахой, Татрий автономе, Киргизе викалий, «Вайнах» центра, шахьара ветераний Совета, Славаьний бувзамхой, моттигерча йоазонхой юкъарлон, Пушкински библиотекай, иштта кхыбарий. Юххера яхьаш чакхйоалаш «Машара ӏадсаькх» дӏахийцар, из доттагӏала, къамашта юкъерча барта, цхьоагӏон белгало яр. Цу тайпара, «Лаура: Лоамий кхайкар» массаза хулача спортал тӏехъяьлар. Цох къамашта юкъера барт чӏоагӏбара, культуран тӏехьале лораяра, цӏихезача мехкахой дагалоаттам лелабара лоархӏаме майда хилар.
