Полицейскеша, юкъара болх бераша дешархошца къамаьл дир
Наьсарерча №13 йолча юкъерча ишколе полице эпсараша, юкъара болх бечо кхетаче дӀайихьар; экстремизма, терроризма духьала къовсам лоаттабарах дола хаттараш дувцаш. Наркотикаш, кхыйола корта бохабу молхаш лелаергйоацаш, ДТП дувзаденна хьехамаш деш, наькъа болама бокъонаш лораяра хаттараш тохкаш, болх бир цар берашца, яхаш, дийцар «Сердало» газетага бокъонаш лораераша.
Хьаьшаша дешархошта хьалхадаьккхар, шоай оагӀонаш тӀа моллагӀа дола зулам хьалхьоадеш дола, иштта экстремизм, терроризм могаеш дола йоазош де йиш йоацилга.
Полицейскеша берашта хьалхадаьккхар наркоманех хьадоала зулам доккха хилар, цо сага могашал толхаеш хилар, цул совгӀа уж лелаеш хиларах саг уголовни бехктокхаме озаш хилар.
Юххера а, даьча къамаьла чаккхе еш, хьаьшаша тӀахьийхар бераш новкъа лелара бокъонаш лораяра, лерттӀа вахара хьисап долча наькъ тӀа уж хилара, Интернета доазон тӀа баьлча.
Цу тайпара кхетаченаш эшаш я, кхувш йоагӀа тӀехье харцахьарча наькъ тӀа яргйоацаш.
