ГӀажарий-Юрта 420 моттиг хургйола ишкол хьалъеш я
09.10.2023 15:56
Шолжа кхален ГӀажарий-Юрта, ГӀалгӀай Республикан гӀишлон министерствос аларах, кхозза вӀаштӀара яь ишкол хьалъеш латт, из лаьрхӀа я 420 моттига, аьнна, хоам бир «Сердало» газетага республикан гӀишлошъераша. №5 йолча юкъерча ишкола кулгалхочун декхараш кхоачашдеш йолча Тебой Мадинас яхачох, керда ишкол хьалъяро таро хулийтаргья кхыйола дешара моттигаш паргIатаяха, цо ший аргӀагIа балха моттигаш а Ӏалашъергья.
«ГӀишлон балхаш дӀахьош ба «Стройпрогресса» болхлой. ХӀанз укх сахьате, йистедаьннад 70% балхаш, пенаш хьахар, шпаклёвка хьакхара болх беррига йистебаьннаб, карарча хана пенашта басар тоха кийчлуш да тхо. Доазон тӀа лостам бар, из чудерзадара болх а йистебаьннаб. ГIишло ший ханнахьа дӀачуяла кийчлуш да тхо», - аьлар цига къахьегарий кулгалхочо Бузуртанаькъан Хаважа.
Ишколе хургья 30 кабинет, актови зал, спортивни зал, кхача кийчду моттиг, лорий кабинет. Арахьа спортивни майдаш хургья.
420 млн сом дӀадодаш йола гӀишло дӀачуяла лерхӀ, ер шу йистедалале. Из хьалъеш я «Дешар дегӀадар» яхача паччахьалкхен программах.
