Долакоа къамаьл хилар наха низ бар яхача зулама духьалъоттарах
Дола-Коарча 325 йолча ишколе йоккхагӀа йолча классашка деша дагӀача берашца къамаьл дир наха низ бара, сий лохде гӀертара духьалъоттарах лаьца, из дувзаденна дар кагирхошта дукхагӀа цу ийрчача вахара наькъах довзийтарца.
Кхетаче дӀайихьар МагӀалбика кхален АТК отдела кулгалхочо Къамурзой Батыра, МагӀалбика шахьара имама Баьтаранаькъан ИбрахӀима, бокъонаш лораяра викалаша дакъа а лоацаш. Из хоам «Сердало» газетага бир шахьара мэре.
«Цига даь къамаьл дувзаденна дар тахан кагирхой Ӏеха а беш, наха низ бар, уж цалархӀар доаржадеш, бӀехача гӀозара юкъебаха гӀерташ дола хьалаш царна ма дарра дӀадовзийтарца. Дешархоша дика дакъа лаьцар, шоашта бакъахьа хета хаттараш а делар, шо-шоай уйлаех лаьца дийцар», - аьлар хоамо.
МагӀалбика кхален администраце программа кхоачашъю хӀаман хьисап долча кагирхой уйла кхы а чӀоагӀагӀа кӀоаргьеш, цу воча наькъ тӀа уж баргбоацаш. Цу тайпара кхетаченаш дӀахьош хиларо кагирхошта юкъера хьал тоаду, чӀоагӀду.
