Магасе нах дукхагӀа хула моттигаш тоаеш латт
14.10.2023 15:30
Магасе дӀахо а дӀахьош ба нах дукхагӀа лелаш йола моттигаш тоаяра болх, из «Фусамаш, шахьара хьалаш» яхача къаман проекта чубоагӀаш ба. Хьабеш болча балха дикал миштай хьежар столица мэре викалаш, иштта Халкъа фронт.
«Доазонаш тоадара болх дикача боараме дӀахьош ба. Тхо хьежар К. Кулиева урамагIа, иштта Чахкенаькъан СаӀида цӀерагӀча урамгара Налганаькъан Элберда цӀерагӀча урамга кхаччалца долча доазон тӀа баьча балхага, иштта тха хьажа таро хилар Горчхананаькъан Iаьлий урам тIарча №4, №6 йолча цӀеношта юкъерча даькъ тӀа баьча балхага. ДӀахо тхо дахар Заьзганаькъан Идриса цӀерагӀча урамаи Коталон 65 шу дизара урамаи юкъерча иттлагӀча микрорайона сквере баьча балхага хьажа.
Уж балхаш йистедоахаргда карарча шера лайчилла бетта», - аьлар «Сердало» газетага администраце зарбан болх лелабераша.
Массадолча тоадеш латтача столицан доакъош тӀа баьццара гаьнаш дӀайогӀаргья. Цига иштта оттаергья зӀамагӀа йолча архитектура гIирсаш.
