«Сердало» газетага из хоам бир яхь вӀашагӀъеллараша. Дерригача дунен кагирхой денна хетаяь яр из турнир. Тайп-тайпарча факультеташка дешаш болча студенташа гойтар, къаьнарча хана денз къаьстта Кавказерча къамашта юкъе даьржа хинна Ӏадсаькх деттара говзал шоай миштай. Университетерча 80 сага юкъе 14 саг Инди мехкара нах бар. Хьалхарча лагӀа тӀа ваьлар 38 очко яьккха Хачубаранаькъан Рашид. 

28 очко яьккхача Боранаькъан Ислама шоллагӀа моттиг кхаьчар. 12 балл яьккхача лорий факультета студенташта Исмейланаькъан Ювназаи Ӏумаранаькъан Адамаи юкъе йийкъар кхоалагӀа моттиг. Кхалнаьха говзал хьаийцача, 46 очко яьккхача Галай Хадена кхаьчар хьалхара моттиг, Орцханаькъан Маришайна кхаьчар шоллагӀа моттиг (38 очко), Мургустанаькъан Аминайна елар кхоалагӀа моттиг (37 очко). 32 балл яьккхар Дарсиганаькъан Хадижас. Цунна елар йиълагӀа моттиг. Туризмах йолча комитета хьалхалаттача Чуранаькъан Мухьмада яхачох, иштта дӀакхухьача яхьо Ӏадсаькх деттара гӀулакх доаржадергда вайна юкъе. Котбаьннарашта елар майдилгаш, совгӀаташ, кхыча къамий студенташта баркал оалаш грамоташ елар, шахьара спортивни вахаре дакъа лацарах.

«Укх шин шера чӀоагӀа безабеннаб сона ер мохк. Безаме, дика нах ба укхаза бахараш. Цхьаккха къамаш къестадеш боацаш, масса хана гӀо де кийча болча наха юкъе ваха, деша атта да», - дийцар Индерча студента Вхакта Акаша.