Цу денал долча, цӀихезача паччахьалкхен болхлочун карагӀдаьннар белгалде лаьрхӀар ва ГӀалгӀай Республикан Кулгалхо Келаматанаькъан Махьмуд-Ӏаьла, яхаш, дийцар «Сердало» газетага вайцигарча министрий кабинета зарбан болх лелабераша. «Сона бакъахьа хет цу гӀулакха Магасе мегаргйола моттиг а леха, хозача моттиге Заьзганаькъан Идриса дагалоаттама сийленг оттадича. Вай дукха хиннаб кулгалхой, бакъда из цаӀ хьалхарчарех хиннав, цо мах баь варгвоаца дакъа юкъеденад вай мохк хьакхоллаш. Дика пхьар (скульптор) хьалаха веза, из болх лерттӀа хьабергболаш», — аьлар Макшарипа Махьмуд-Ӏаьлас. Цо белгалдир, тӀехьа тӀайоагӀа тӀехье, туристаш, вайцига хьаухаш бола хьаьший ха дезаш ба, ший Даьхенна иштта дукха къахьегаш, халкъа хьашташ кхоачашдеш, хьинар ца кходеш, хьавена вай мехкахо малав а иштта цунна карагӀдаьннар фуд а. Заьзганаькъан Идрис наьха дегашка висав, ший мехка мутӀахьа вола вахархо, бокъонца вола къонах, нийсхон тӀехьа лаьтта саг санна. Ший хьамсара мохк бахьан долаш, цо дукха къахьийга хилар наха ховш хила деза.