Дикка хувцамаш даь, «Дагалоаттама, сийлен парк» хьайийллар Шолжа-Шахьаре
Дикка тоаеш хувцамаш даь, «Дагалоаттама, сийлен парк» хьайийллар Шолжа-Шахьаре. Цу гӏулакха хетаяьча кхетаче дакъа лоацаш хилар вай Мехкада Келаматанаькъан Махьмуд-ӏаьла.
Тоаяьчул тӏехьагӏа, 10 эзар совгӏа кв. метрага кхоачаш моттиг хилар цох. Цу юкъе да боккха болх дӏахьош меттадоаладаь культуран цӏа, керда суртий галерея. Ший къамаьла юкъе, вай Мехкадас белгалдир, шахьара керттера моттигаш тоаяр лоархӏаме болх болга.
Дукха ха йоацаш, иштта болх дӏабихьа шахьарера стадион а меттайоалаяьлга белгалдир мехка Кулгалхочо; дӏахо, ӏама юхера берий парк тоаеш, болх дӏаболабе безилга теркалдир. Мехкадас иштта хьоахадир, цхьаццабарий доалахьа хинна 5200 кв. метрага кхоачаш дола лаьтта шахьара доалахьа дийрзалга, из бахьан долаш бахархоша салоӏаш йола моттиг дикка дӏашеръе вӏаштӏехьдаьлар.
«Цу гӏулакхо аьттув белар из доазув дикка шерде. Бахархоша, бераша салоӏаш, ха дӏахьош йола моттигаш боаггӏача боараме меттайоалае гӏерташ, къахьег тахан мехка, из лоархӏамеча декхарех да», - аьлар мехка Кулгалхочо. Мехкадас хьоахадир, шахьаре даггара долхаш гӏишлон балхаш долга, из бахьан долаш даьсса дада лаьтташ кӏезигагӏа хулаш латт. Бокъо йоацаш гӏишлош хьалъяра духьала суде гӏолла къовсам лоаттабе безаш хул кулгалхой.
«Болх дика дӏабахьарах баркал оал аз шахьара да волча ӏумаранаькъан Аслана, хӏаьта бахархой шоашта лаьрхӏа тоаяь моттигаш лораяра, доал дара тӏахьех», - аьлар мехкадас. Тоаяьча парке гаьнаш, кӏотаргаш дӏаегӏай; лампаш, кхуркхолг оттабаь, гӏандаш дегӏа, нувхашта лаьрхӏа массанахьа яьшкаш чӏоагӏъяь; хувцамаш даьд . 650 кв.метрага кхоачаш я тахан парк. Эггара лоархӏамедар, массаза йоагаш йолча цӏера юхера 28 метр йола стела меттайоалаяр.
