«Блокадни маькх» яха ерригача Россе болам дӀабихьар Шолжа-Шахьаре
30.01.2024 10:12
Шолжа-Шахьаре дӀабихьар, ерригача Россе моттигаш чулоацаш бола «Блокадни маькх» яха болам. Из хоам «Сердало» газетага бир шахьарерча администраце.
«Вахара политиках болча оагӀон болхлоша дӀабихьар «Блокадни маькх» яха болам. Бахархошта дӀадийкъар цун истори дувцаш дола каьхаташ, бирсача тӀема шерашка дӀаекъаш хинна маькха чӀегилгаш елар наха», - йоах тхогарча хоамо.
Белгалде деза, Ленинграде баь хиннача гонна юкъе дакъа лоацаш вай мехкахой а хиннилга. Блокадни маькх цар бӀаргашка, дегашка яха йисаяр цар мел йоаккхача хана.
Нева яхача хи тӀа улла шахьар фашистех лораеш, из цигара вохаваьраш вай боккхача мехка исторе баха бисаб, цӀаккха бицлургбоацаш.
