ЛоархӀаме дола урамаш тоадеш латт Шолжа-Шахьаре
Шолжа-Шахьарера Выгонни, Энгельса оалаш дола урамаш тоадеш бола болх чакхбаьнна бала боалл. Мехкадаь зарбан болх лелабераша бир из хоам «Сердалога». Выгонни оала урам шахьарерча базара юхе улл.
БӀаьсти цига цӀи яьннача хана денз, къаьстта терко лоаттаю цу моттига. Мехкадас Келаматанаькъан Махьмуд-Ӏаьлас тӀадиллад, из доазув боаггӀача боараме меттадоаладе, аьнна. ДогӀан хишта лаьрхӀа турбаш чуйоахкаш, 160 метрага кхоачаш гӀашлой никъ буллаш, къахьегаш латт цига. Иштта 64 машин Ӏооттае йиш хургйола моттиг къоастаеш латт. ХӀамаш йохкача моттигий куц эргадоаккхаргда, тховнаш хувцаш, тӀера хозъеш. Деррига балхаш тӀахьожам лоаттабеш да, ер бутт чакхбоалача хана кхоачашдаь хила деза уж. Иштта хувцамаш даьд керттерча парка, культуран цӀенна тӀабодача Энгельса урам тӀа а. 140 метр асфальт Ӏобиллаб, гӀашлой никъ тоабаьб, машинашта доазув къоастадаьд цига а. Цул совгӀа, хий чудуллаш, лаьттан кӀалха гӀолла газа турбаш чуйоахкаш къахьийгад цига.
«Шолжа-Шахьарерча бахархой хьал ма хулла аттачахьа даккха гӀерташ къахьег тахан. Цу оагӀонцара болх тӀадоагӀача шера а дӀахьоргба, кхыйола кхаленаш юкъе лоацаш», - белгалдир Келаматанаькъан Махьмуд-Ӏаьлас.
