Шолжа шахьаре вахаш волча Сейнарой Мусас ший низаца урам тоабир
24.08.2026 15:44
Шолжа шахьарера Гайдара цӏерах бола урам тоабе эттар цига вахаш вола Сейнарой Муса. Боккха болх дӏаболабарга хьежаш ца вагӏаш, дерригнен ше дӏахьалха этта цу доазон тӏа лостам бе лаьрхӏар цо. Из хоам «Сердалога» бир шахьара администраце.
«550 метрага кхоачаш болча урама хьал ший низаца меттаоттадеш хилар вахархо. Хин лини хийцар, догӏан хишта лаьрхӏа урама шаккха оагӏонца каналаш тоадир, иштта асфальта никъ ӏобиллар. Белгалде деза, Сейнарой Мусас, цун вежараша шахьарера кхыдолча урамашта а балхаш дӏакхихьалга», - йоах тхога бенача хоамо.
Шахьара моттигех дог лазаш волча вахархочо гӏо дарах урамера хьал дикка паргӏатагӏа, хозагӏа да тахан. Цу гӏулакхо хьагойт, духхьала цхьан сага низаца мела дукха хӏама хувца, наха атто е йиш я.
