Суворова цӏерах болча урама куц тоадеш боахк Шолжа-Шахьаре
Суворова цӏи лелаеш болча урама хьал меттадоаладе лаьрхӏа арабаьлар Шолжа -Шахьаре. 500 метрага кхоачаш болча ураме массехк оагӏонца хувцамаш де лерхӏ. «Гӏашлой никъ тоабеш, догӏан хишта лаьрхӏа йола канализаци меттайоалаеш, иштта асфальт ӏобулларгболаш кӏалхара кӏийле шаьръеш боахк цига.
Хьалхагӏа 400 метрага кхоачаш хин лини хувцаш болх дӏабихьабар цига. Къаьстта терко ю догӏан хиш хьаӏовргдоацаш дӏабахьа безача балха. Цу оагӏонцара болх дӏахьош латта шахьарера ялхлагӏа урам ба из. Маьцхали бутт чакхбалалехьа беррига болх йистебаккха лерхӏ цига», - йоах «Сердалога» Шолжа-Шахьарерча администрацера бенача хоамо.
Суворова цӏерах болча ураме баха нах халача хьале хулар, геттара чӏоагӏа догӏаш латтача хана, коашка хий чудувлаш, кердача канализаце из хьал меттадоаладергда.
