Базара гонахьара доазув меттадоаладеш ба Шолжа-Шахьаре
Базара гонахьара моттиг меттайоалаеш ба Шолжа-Шахьаре. Выгонни оалача урам тӀа, балхаш дӀадоладаь, боахк тахан. ГӀаш леларашта паргӀатта дехьабувла моттиг къоастаергья цига. 160 метрага кхоачаш дӀоахал, 1,6 метрага гӀорташ шорал дола гӀашлой никъ буллаш латт ювцача моттиге. Цул совгӀа, догӀан хишта лаьрхӀа канализаци а хургья цига. Шахьарера моттигаш цӀена лоаттаяра тӀехьа лоархӀаме ба из болх.
«Къаьстта терко йир машинашта лаьрхӀача моттига. 64 машин Ӏооттае йиш йолаш хургба цигара бахархой. Шахьара кулгалхоша лакха тӀахьожам беш дӀахьош латт уж балхаш. Администрацена кулгал деш вола Ӏумаранаькъан Аслан вар цига хьажа вена. ДӀахо кхоачашде дезарех дийцар цо болхлошца», - хоам бу «Сердалога» мэре.
Шахьара администраце хьалхадаьккха дӀахьош ба из болх, хӀаьта дакъа лоацаш цигарча моттигашкара хӀама йохкараш ба. Ер шу чакхдалале, йистебаьккха хила безаш ба беррига болх.
