Шахьара моттигий куц толхадарах долча 12 гӏулакхага хьожаш хилар Шолжа-Шахьаре
Шолжа-Шахьарерча администраце кулгалхо волча ӏумаранаькъан Аслана административни комиссе кхетаче дӏайихьар. Цу оагӏонцарча гӏулакхех бола администрацера болхлой бар цига дакъа лоацаш. 12 гӏулакхах дийцар хьакима гулбеннарашца. Шахьара моттигий куц толхадерашта духьала хьадийлладар уж гӏулакхаш.
«Къаьстта терко тӏайохийташ дийцар кхетаче гӏишлон балхаш дечара совъяьнна йоккхий хӏамаш, нувхаш дӏакхувсарца гӏалатбаларах; бокъо йоацача тайпара машинаш ӏоувттаярах, иштта кхаьч-кхаьчача реклама еш дола улгаш увттадарах. Уж хӏамаш лорадеш боацараш бехктокхаме озарах дийцар хьакима. Цу оагӏонцарча бокъонна тӏатайжа, 5 эзар сомагара 10 эзар сомага кхоачаш гӏод тохаргда гӏалатбаьннарашта», - дийцар «Сердалога» Шолжа кхален администрацен зарбан болх лелабераша.
Мэре белгалдир, кхоачамбоацараш юстарадоахаш боацараш шозлагӏа бехктокхаме озаргболга. Ма дарра аьлча, цӏаькха теха гӏод доккхагӏа хургда.
