Цӏера духьаларча кийчон болх дӏахьош хилар МЧС, Наьсарерча «Фабрика» оалача ТЦ
Наьсарерча «Фабрика» яхача мах беча моттиге, цӏера духьаларча кийчон болх дӏахьош хилар МЧС. Цӏаьхха, цӏи яьнна хатар нийсделча, эггара хьалхарча оагӏонца фу де деза наха хьалхадоаккхаш болх бар из.
«МЧС оттадир, цу гӏишлон йиълагӏча гӏата тӏа тока саьргаш бахьан долаш цӏи яьлча санна. Сов чӏоагӏа кӏур хиларах геттара кхерамеча хьале дийрзар гӏулакх. Цӏи яларах хоам беш долча гӏирсаша цу миноте оарц даьккха, хьакхаьчар МЧС. Массайолча моттигашка хьажа эттача, МЧС болхлошта кӏура юкъера аравала ца могаш виса ялх саг коравир. Массехк саг МЧС лоами хьатӏаоттабаь араваьккхар, кхы а массехк саг цу лакхера шоай гӏирсашца ӏоваьккхар. Кӏалхарбаьхараш лорий машинага дӏабелар цар», - «Сердалога» из хоам бера Россе вай мехкарча МЧС болхлошкара.
Оттаяьча сценарех, цӏи дӏайоае аьттув баьлар цар. Беррига болх чакхбаьккхачул тӏехьагӏа, шоай гӏулакх боаггӏача боараме чакхдаьларий хьожаш хул МЧС болхлой.
