Йоккхача Ачалкхе ишкол хьалъеш я, «ЦӀенош дераш» яха ООО
«Дешар» яхача къаман проектага гӀолла, 420 бера лаьрхӀа кхозза вӀаштӀаръяь ишкол хьалъеш латт, Йоккхача Ачалкхерча Горни оалача урам тӀа. Болх дӀахьор я «ЦӀенош дераш» яха OOO. Из хоам «Сердало» газетага бир гӀишлой балхах йолча Министерствоc.
«Ши гектар совгӀа долча доазон тӀа, кхозза вӀаштӀаръяь ишкол хьалъе болабелар, 2022-ча шера ахкан шоллагӀча бетта. Таханарча дийнахьа 45% болх йистебаьннаб цига», - йоах тхогарча хоамо. Фронтонаш хьаеш, чура балхаш деш, токацара, хицара гӀулакх мишта хила деза хьожаш, тхов нийсбеш, хьинаре къахьегаш боахк цига.
Таханарча хано дӀадеххача тайпара, дешархошта мел эшача хӀаманца кхоачам болаш, хоза тоаяь ишкол хургья цох. Ер шу йистедалале, кийча хила езаш я ишкол. Юртарча наха доккха совгӀат да, цхьаькха керда ишкол.
