Южне 320 моттига лаьрхӀа ишкол хьалъеш латт
МагӀалбика кхален Южне хьалъеш латт, 320 моттига лаьрхӀа керда ишкол. Юртахой сатем байна хьежаш ба из хьалъяь яларга, хӀана аьлча таханарча дено дӀадеххача тайпара дикача хьалашка деша таро хургья цар берий. ТӀера хьалъяь яьннай ишкол, пенаш а чура йовкъаш йохкара а балхаш даь даьннад. Тхов тиллаб, цӀи ялара кхерамзленна Ӏалашо ярца дувзаденна балхаш чакх даьхад. Гонахьарча карта лардаш дӀайохкаш латт.
АргӀанара болх бе лаьрхӀад, пенаш хьоахаш, чудилла мел деза хӀама чудуллаш. Цу ишкола чуйоагӀаш я актови зал, библиотека, кхача кийчбу а хӀама юа а моттигаш. Ер шу йистедоалаш 320 моттига лаьрхӀа йола ишкол болх бе йолалургья», - аьлар «Сердало» газетага МагӀалбика кхален администраце.
Из ишкол хьалъеш я «Юртара хьалаш дегӀадоаладар» яхача программах.
