Бӏухошта эша хӏамаш тӏайола машин ӏокхаьчар СВО
Бӏухошта эшаш йола хӏамаш ӏояхьийтар СВО. Из хоам «Сердалога» бера Мехкадаь зарбан болх лелаберашкара.
«Бӏухошца бувзаме болаш, цар шоашта эш аьнна хӏамаш я гулъяьраш. Укх безача Рамадан бетта цига латташ а марха кхоабаш а ба вай бухой, цунга хьежжа марха дехкаш, доасташ, царна эшаш бола кхача ба гулбаьр. Цу юкъе да докъадаь а дашаделла а дулх, хаьсаш, хий, ӏажаш, иштта кхыбола кхача», - белгалдир вай мехкадас Келаматанаькъан Махьмуд-ӏаьлас.
Тахан Даьхен хӏама лораде арабаьннарашта терко лоаттаеш, цар гӏулакхага хьожаш хила деза вай дерригаш. Шоаш дагабоахкилга, шоашта тӏехьа дуӏаш делга хоалуш хила деза царна.
«Уккхаза цӏагӏа царга хьежилга, могаш-маьрша болаш ма хулла кастагӏа цӏенах кхетарга сатувсилга цар кхетадар деза вайна. Царна мел эшар лоаттадар, массахана царца бувзаме долаш хьашташ кхоачашдар – из вай декхар да», - аьлар Мехкадас.
