Кхувш латтача тIехьенна наркомани яхача зуламах дийцар Заьзгакъонгий-Юрта
Кагирхошта юкъе тахан даьржа латтача зуламах, наркоманех дувца гулбелар Заьзгакъонгий-Юртарча культуран цIагIа. Кхетаче дакъа лоацаш бар кхален кулгалхочун гIонча вола Хамхой Iалихан, МагIалбикерча райсовета депутат Iаьленаькъан Дауд, юрта кулгалхо ЦIечой Ювназ.
Из хоам «Сердалога» бир кхален мэре болхлоша. Наркомане сага вахар толхадарах, унахцIено вIашкаяхьарах дийцар гулбеннараша. Культуран цIен кулгал деча Чаненаькъан Тамарас кхетаче хьаеллаш белгалдир, хозача оамалашца, массахана пайдане долча хIаманца бувзам лелабеш хилар кхувш латтарашта мел лоархIаме да.
Культуран цIеноша, библиотекаша, спорта моттигаша кагирхой тIахьех, дикача хIаман тIехьа ха дIаяхьа. Бусалба сага наркоман хинна дIавахар доккха эхь, сий довр да, аьлар гулбеннараша. Шоай дин Iомадеш, спортаца бувзам лоаттабеш, дикача гIулакхашка белгала волаш хила веза бусалба саг.
