ЛоархӀаме никъ тоабе лерхӀ 2024-ча шера
«Кхераме доаца дика наькъаш» яхача къаман проектага гӀолла тоабе лерхӀ укх шера Наьсар-Кертен оалача урам тӀара никъ. Цох лаьца дийцар вай Мехкадас Келаматанаькъан Махьмд-Ӏаьлас, дукха ха йоацаш хьакимашца дӀайихьача кхетаче. Из хоам «Сердало» газетага бир Мехкадаь зарбан болх лелабераша.
«Наькъаш тоадеш дӀабахьа безача балхага, кийчо еш латт. БӀаьстан ха хьаоттарца тоабе болабергба Дала аьннадале, Наьсарерча Наьсар-Кертен оалача урамера лоархӀаме никъ. 10 шу совгӀа ха я из моттиг, тоа ца еш, латта.
Къаман проектага гӀолла, куц хувцалуш латт вай шахьарий, юртий. Дуккха а беркате хувцамаш гу вайна тахан унахцӀенон, дешара, культуран оагӀонашка. Тахан вай аьттув ба наькъаш дикка тоаде, кердадараш Ӏодахка», - белгалдир вай Мехкадас хьакимашка къамаьл деш.
Иштта цо тӀатехар, наькъашкара кхерамзле лораяра тӀехьа эггара керттера дакъа наькъий хьалага кхоач, аьнна. Наьсар-Кертен оалаш бола урам дукха машенаш лелаш моттиг я. ЛоархӀаме, дукха нах тӀалатташ болха моттигаш я цига.
Наькъий гӀулакхах йолча министерствон болхлоша лаьрхӀачох, кӀоагаш доахкаш телха никъ гургбац вайна цига, тӀехьа тӀайоагӀача хана.
