Илдарха-Гӏалийтӏарча №5 йолча ишколе денала Урок дӏайихьар СВО ветеранаша
Илдарха-Гӏалий тӏарча №5 йолча ишколе Даьхенцарча безамах йола кхетаче дӏахьош хилар. Бераш долча баьхкабар тӏема операце ветеранаш, цар дийцар тӏема аренашкарча доттагӏалах, вӏаший гӏо дарах, лоархӏамеча декхарех. Из кхетаче вӏашагӏъеллараш бар «Даьхен лорабой» яхача ганза мехкарча филиала болхлой. Тӏема аренашка халача деноех чакхбаьнна бӏухой: Хамхой Ислам, Евкуранаькъан Ислам, Дзангенаькъан Хьусен, Темарханаькъан Ӏамархан, Хазанаькъан Ӏаьла, Оскананаькъан Аслан - бар бераш долча баьхка хиннараш.
«Сердалога» бенача хоамах, хаттар-жоп долаш дӏаяхар кхетаче. Ветеранаша дешархошта дийцар, тӏема аренашка шоашца нийсденнарех, Даьхенцарча безамах, лерхӏамах, моллагӏча моттиге кхачарах массахана вӏаший тӏаотташ, вошал леладеш хила везилгах. Деналах, майралах бизза болча къаман къонгий тӏема истореца дувзаденнарашка ладувгӏаш, бераша дукха хӏама кхетадир.
Белгалде деза, «Даьхен лорабой» яхача ганза филиало ветеранашца бувзам лоаттабеш, иштта йоаржаеш йола кхетаченаш къонача тӏехьенна пайда беш йолга.
«Турпала Парта» яхача федеральни проектага гӏолла, вай мехка 270 цӏерах парташ хьайийллай, тӏема операце бӏухошта хетаяь ишколашка музееш, иштта кхыйола 97 юкъарлон моттигаш хьаяьй.
Тӏема аренашка Даьхен хӏама лорадеш лаьттарий цӏераш йовзийта эшаш да из деррига.
