ГӀалгӀай къаман
юкъара газет

Кердадараш

МагӀалбика кхален хьалхашкарча керттерча декхарех дийцар республикан кулгалхоша

МагӀалбика кхален администраце кулгалхошца, юртарча администрацей болхлошца, кхален совета депутаташца кхетаче дӀайихьар Мехкадас Келаматанаькъан Махьмуд-Ӏаьлас. Дийцар, 2023-ча шера дӀабихьача балхах, дӀахо кхоачашде дезарех. Из хоам «Сердало» газетага бир республика кулгалхочун зарбан болх лелабераша.

«Дешарах, гӀишлошъяра балхах, энергетиках, ЖКХ гӀулакхех йолча министерствай кулгалхой бийхабар аз цу кхетаче, юртий администрацей кулгалхой, депутатий хаттарашта цар жоп лургдолаш. Сона лоархӀаме дар цигара кхоачамбоацараш довзар», - белгалдир вай Мехкадас. ДӀайихьача кхетаче дийцачунга хьежача, эггара чӀоагӀагӀа наха дагадоахкаш дола хаттараш гӀишлош хьалъе эшача лаьтташца, наькъий хьалаца, светофорашца, наькъашка латтача гӀармашца дувзаденна дар. Иштта кертерчарех дар хицара, токацара, газацара кхоачамбоацараш. Заьзганаькъан-Юрта, Кердача Реданте хьалъе езача ишколех дийцар кхетаче. «Со-се тӀахьожаш тахка дезарех да уж гӀулакхаш. Федеральни оагӀонгара ахча ца хуле, вай къаман ганзера рузкъа хьакъоастадергда вай. Тесса дита йиш ярех дац уж гӀулакхаш! Керда ишколаш цу моттигашка эггара хьалхарча юхьанца хьалъе езаш я», - белгалдир вай Мехкадас. Республикан кулгалхочо хьоахадир; ишттача мугӀарера болх ерригача кхаленашка дӀахьоргба, аьнна. Цу гӀулакхо гучадоах кхоачамбоацараш, наха дуккхача шерашка къувлараш. Цул совгӀа, мехка хьакимашцара бувзам кхаленашкарча, юрташкарча администрацей кулгалхой хиларга хьежжа, дикагӀа тохкалу деррига.

Электронни газета язле

(PDF) кӀира цкъа арадувла къаман юкъара «Сердало» газет, цӀагӀара ара ца воалаш деша таро я

Хьаязде