Бахархой латкъарах, Наьсарера экологи толхаераш меттадоаладир хьакимаша
Осканаькъан цӏерах долча доазон тӏа «Портофино» оалача кафен юхе хьаӏайна латтача бӏехача хӏамаех геттара во хьадж йоагӏа, яхаш, бахархой латкъаш бола дикка ха яр. Шутуранаькъан Ахьмад хьалха волаш, тоаба яхийтар шахьара дас Оздой Руслана; цигара хьал тахка, аьнна. Дӏабихьача балхо гучадаьккхар, бетона ӏоакъашта кӏалгӏолла бокъо йоацача тайпара чуяьхкача турбашка гӏолла догӏан хишта лаьрхӏача канализаце бӏеха хиш ӏочуухаш хиннилга.
«Бокъо йоацача тайпара чӏоагӏъяь хинна турбаш дӏаяьхар, хӏаьта из хӏама даьрашта духьала лоткъам оттабир. Цу гӏулакха бехкебараш, цхьаккха шеко йоацаш, бехктокхаме озаргба боаггӏача боараме! Цул совгӏа, цу гӏишлон доал деш волчунна тӏадиллар, бохабаь асфальт тоабар, цу дерригача доазон хьал боаггӏача боараме меттаоттадар. Кхоачамбоацараш гучадоахаш йола рейдаш шахьара массайолча моттигашка дӏакхухьаргйолаш я», - дийцар «Сердалога» Наьсарерча администраце.
Оздой Руслана белгалдир, бокъо йоацача тайпара турбаш чуяьхка, бӏеха хиш ӏоухийташ багӏараш боаггӏача боараме бехктокхаме озаргхилар. Шахьара экологически оагӏонцара хьал толхадар иштта чакхдоалийтаргдолаш зулам дац!
