«Магас» оалача спорта ЦIагIа дIахьош, волейболах яхь я
Йовлой Берда цIерах долча «Магас» спорта ЦIагIа, волейболах йола яхь дIаяхьа гуллуш ба тахан. Терроризм яхача доккхача, бIехача зулама духьала къовсам лоаттабеча халкъашта юкъерча Денна хетаяь я уж яхьаш.
«Ялх тоабан доакъашхой ба, ше-ше котвала гIерташ, къовсабеннараш. Хьажархошта совгIаташ долаш, массехк яхь кийчяьй цига. ТолашагIбараш белгалбергба кубкашца, грамоташца, майдилгашца, хIаьта яхье эггара дикагIа волчунна къаьстта совгIат дала лаьрхIад», - дийцар «Сердалога» мехкарча Минспорте.
Къонабараш спортá, нийсача вахара тIахьехаш боаржабеш болх ба из тахан. Воча, бIехача зулама къонабараш юстара хилийтара тIехьа, нийсагIа а дикагIа а дар царна хьалхадоаккхаш, беркатеча наькъ тIа шоай гIулакхаш тоаде царна гIо де хьажа дезаш да вай, цунга хьежжа лоархIаме да иштта йола яхьаш йоаржаяр.
