Наьсарен искусствай берий ишколан дешархоша шоай ноаношта цӀай дир
25.11.2023 01:44
Наьсарен-Шахьара искусствай берий ишколе, дуненна дукхача мехкашка дездеш дола Халкъашта юкъера наьна ди долаш, царна хетадаь концерт делар. Кхетаченах сийрда ди хилар берашта а ноаношта а. Ашарий совгӀаташца кхайкадир ноаношка эггара дӀайхагӀа дола дешаш.
«Концерте, цхьа саг юстара вусаргвоацаш, дог тохадолийташ дола кӀаьда дешаш аьлар ноаноех.
Бераша боккхача бехктокхамца дӀадихьар из концерт; хӀара илли, йиш дег чура оалаш.
ЗӀамигача доакъашхоша а дика дакъа лаьцар», - аьлар «Сердало» газетага ГӀалгӀайчен культурна министерствос.
Концерт луш, хоалуш дар сийрда, йӀайха, безаме из моттиг хилар, хӀаранена хеталора, ше боккхача дезала цӀайна доакъашхо волаш санна.
