Лазарашта духьала маьхий тохара терко е, яхаш, дехар ду лораша
26.02.2024 11:30
Шера цкъазза даржаш долча тайп-тайпарча лазарашта духьала маьхий тохара терко е, тесса ма дита из гӀулакх, яхаш, дехар ду лораша. Къаьстта чӀоагӀа терко е еза цу хӀаман ковид яха лазар текхараша, 45 шерал тӀехбаьннача наха.
Маьхий тохар мел лоархӀаме да дувц бахархошка эндокринологически диспансера лор йолча Тамасханаькъан Алинас. Цо белгалдечох, ханнахьа маьхий тохаро даржаш дола лазараш юхатох.
«Мах боацаш тоха йиш йолаш ма дий уж маьхий, цул совгӀа, нах бахача моттигашка дӀаухаш, бу из болх лорий тоабаша. Цхьаннахьа баха ца безаш, чакхбала йиш йолаш ба тахан бахархой шоаш бахача моттиге. Боккъал а терко е цу гӀулакха!» - белгалдир Тамасханаькъан Алинас.
