«Еррига тха моттигаш эшаш долча гIирсашца Ӏалашъяь я, уж да 36 культура цӀа, йиъ района культурни салоIама ха дIаяхьара йола центраш, иштта культуран Министерствон чуйоагIаш йола 15 фусам, цу юкъе берий искусствон ишколаш а йолаш.

Шолжерча культуран цIенна ийцаб шиъ цифровой фортепиано, ашарий центраш», — аьлар министра.

ДукхагIдола музыкальни гIирсаш ГIалгIай Республике ийцад кхо шу хьалха, Россех вай дIакхийтта 250 шу дузача хана.

Федеральни бюджетера ахча хьадайтарах, эца вIаштIехьадаьлар уж, цунца дувзаденна дукха гIулакхаш а кхоачашдир.

Дукха ха йоацаш, кхыметтел цхьанна а ишколе яцар арфа, цхьайолча ишколашка яцар альт а чIондарг а.

Хьехамчаш а Iомалушбараш а шовзткъа шу хьалха ийца хинна пианино, каьхата пандар лелабеш бар.

Юкъара хьаийцача, цу ахчах 750 гаргга инструмент ийцар, царех 223 дIа-юха елар 36 культуран цIенна, иштта  520 инструмент — ГIалгIай Республикан чуйоагӀача кхыча моттигашка кхаьчар.

Цхьаццайола хIамаш хьалхара эцаш яр, цхьаяраш заказах хьа а яйтар — гобойш, каьхата пандараш. Цул совгIа цу инструменташта тIакхийтар дахчан пандараш, каьхата пандараш, фаташ, уж къаман инструменташ санна лоархIаш я. Долаш да жаргIаш, роялаш, пианинаш, чIондаргаш, гатараш, зурмаш.

Лаьнанаькъан Залинас яхачох, 2021 шера, федеральни программа кхоачашъеш хиларах, МагIалбикерча берий искусствай ишкола 1,15 млн сома маьха йола ашарий инструменташ, кхыбола гIирс, дешара материалаш ийцар.

«Нагахьа санна тахан вай музыкальни ишколаш эшача инструменташца Iалашъяь ца хуле, мехка культура дегIайоагIаргьяц.

ЧIоагIа лоархIаме да массе оагIорахьа бераш дегӀаахар, ашарашца дувзаденна из дале а, е культура кхыча даькъца дале а», — аьлар республикан кулгалхочо Келаматанаькъан Махьмуд-Iаьлас.

Цо белгалдаьккхар, культуран даькъ тIа лерттIа берашта кхетам луча, хьалхарча аргIах эшар да говзал лакха йола хьехархой хилар, иштта эшаш долча хIамай кхоачам а инструменташ а хила еза.