«НачIал долча суртанчаца Куштанаькъан Эльмирайца цхьана, хьаьший таро хилар искусствон дуне довза, шоай кхоллам гойта. Говзанч-хьехам дIабихьар паргIатта, хIара доакъашхочунна ший кхоллама тIехьале хьагойта таро а луш, безам тIабодаш. Цу юкъе дакъа лаца безам болаш вена саг, хIаравар таро йолаш хилар ший кулгашца доккхий картинаш хьаде, Эльмира тIахьожаш, дIахьош бар из болх», - аьлар тхоца къамаьл даьчо.

Куштанаькъан Эльмирас ший балха говзал йовзийтарал совгIа, массанена шийгара масал делар, царна бIаргагуш сурташ а дехкар. Цун говзанч-хьехаме дакъа лаца хьабаьхкараш цецбаьнна бар, йоккхача терконца хьежар уж Эльмирас дIахьош хиннача балхага.

Говзанч-хьехамга хьежачул тIехьагIа, берригаш а дIаухар, шоаш цу даькъ тIа кердадараш Iомадаь хиларах раьза болаш. Из говзанч-кхетаче цIаккха йицлургйоацарех яр, цига хьабаьхкача наьха аьттув баьлар кхоллама, искусствон хозал го, шоашта хов хьажа.