Хоронько Игора ший балхаш делар, ГIалгIайчен суртанчий мезейна
09.11.2023 00:06
ГIалгIайчен сурташ дехкарий искусствон паччахьалкхен музее дIахьош хинна Хоронько Игора лаьрххIа бола гойтам чакхбаьлар. «Моттигаш хотташ» яхача болама чубоагIаш бар из. Массехк дийнахьа живопись езарий таро хилар цIихезача суртанчан, Россе суртанчий Союза доакъашхочун кхоллам бовза. ГIалгIайченца Iадика ювцаш, Хоронько Игора музейна ший ши болх белар совгIата: «Архызера кIимарса бетта сайре», «Кисловодска даькъ тIа».
«Из камоаршала гIулакх тешал деш да, вIалла кIаьд ца луш, вай хьалкхувш йоагIача тIехьен вахара хозал кхоаненна йита дагахьа беш бола болх цо лоархIаш хилара.
Оаха баркал оал Бориса Игора, совгIаташ даларах.
Со тешаш я, дIахойодача хана, цун сурташа шоай моттиг дIалоацаргья музея гойтама юкъе. Иштта цун сурташа укхаза хьажа боагIача наьха безам тIаозаргба, начIал долча суртанчас баьча балха тамашийна белгало хоалургья царна», - аьлар «Сердало» газетага сурташ кхолларий паччахьалкхен музея кулгалхочо ТIумхой Любас.
