Республикански яхье котало яьккхар Наьсарен кхалерча къонача самбисташа
Дербичанаькъан Хизара хетаяь куртка йоацача самбох йола яхь дӏаяхьа гулбелар Наьсарен кхале. Пхьилекъонгий-Юрта дӏахьош хиннача вӏашагӏакхетаре физически оагӏонцара кийчо дика йола спортсменаш бар.
«Геттара белгалбаьлар цу яхье Долакха-Юртарча берий-кагирхой спорта ишколо кхебаьраш. Пхиъ дошо, ялх дото, ялх борза – 17 майдилг яьккхар цар. Тоабанна дошо майдилгаш йоахаш, лакхерча лагӏа тӏа баьннарех бар Гайтанаькъан ӏарби, Гайтанаькъан Амин, Гаданаькъан Мухьаммад, Кӏанташанаькъан Исмаӏал, Геласханаькъан Мухьаммад. Дото майдилгаш ӏоэхкар Гасаранаькъан Мухьаммада, Янданаькъан Ахьмада, Баркинхой Мухьаммада, Горбакханаькъан Хьамзайна, Келиганаькъан Мухьаммада, Гелисханаькъан Халида. Борза майдилгаш йоахаш белгалбаьлар ӏарчакханаькъан Мухьаммад, Гаданаькъан Мухьаммад, Манкенаькъан Ювсап, Олиганаькъан Ӏаддал-Малик, Горбакханаькъан Сайт-Мухьмад, Хутенаькъан Заьлмаха. Самбисташ кхебеш лаьтта тренер - Геласханаькъан ӏаддал. Дика кийчо яь спортсменаш шоаш болга дӏагойта аьттув баьлар Долакха-Юртарча ишколо ураоттабаьча самбистий», - дийцар «Сердалога» Наьсарен кхален администраце.
Белгалде деза, иштта йола яхьаш вай республике лоархӏаме йолга. Къонача спортсмений говзал лакхъеш дола гӏулакх да из.
