125 эзар саг лорашка чакхваьлар 10 беттага кхоачача юкъа
Укх тIехьарча итт бетта, 125 эзар совгIа саг ва, шоай дегIа могашал тахкар духьа, лорашка чакхваьннараш. Из хоам «Сердало» газетага бир унахцIенон гIулакхах йолча министерстве.
«18 шу даьлча денз, кхаь шера цкъа дарбанче чакхвоалаш хила веза саг, 40 шерга кхаьчача, хIара шера чакхвоалаш хила веза.
«УнахцIено» яхача программага гIолла, мах боацаш, дIадахьа йиш я из гIулакх. Ханнахьа чакхвоалаш хилча, моллагIа долча лазара дарба де аттагIа хул лорашта, цул совгIа, ший дегI кIалдутаргдац хан-ханнахьа ший могашала терко еча сага», - белгалдир министерстве. ХIара сага телефона тIа хоам боагIа, вахача моттигерча амбулаторе чакхвала из тIавехаш.
Ше вахача доазон терко лоаттаеш йолча терапевтá картеи полиси ийца дIатIавахача, дIаходар цар дIачакхдоаккхаргда. ЧIоагIа лоархIаме да каст-каста лорашта тIаводаш хилар. Хала лоархIаш дола лазараш хьакхийттача хана гучадахаро дукха хIама хувц.
