Укх кӀира газаца дувзаденна хатар хинна ши моттиг я республике
Дукха ха йоацаш, Илдарха-ГӀалий тӀа хилар газацара хатар, хӀанз - ГӀажарий-Юрта. Шелал хӀанз хьаотташ мара еце а, хатараш даржаш латт. Газа угарах хатар хинна дарбанче Ӏочубигаб ГӀажарий-Юртара нана, диъ бер. Белгалде деза, царна юкъера ши бер геттара зӀамига долга. Из хоам «Сердалога» бир республикерча МЧС ГУ. Иштта дола хатараш нийсдалара бахьан газацара кхерамзлен гӀулакх лорацадар да.
«Газ харцахьарча моттиге гӀолла араювлаш хуле, из ше дӀайовргйола гӀирсаш оттадаь, ахча дохка безам болаш хилац нах. Цул совгӀа, иштта дола хӀама хоаделча, ший болх бовзаш волча цу мугӀарерча болхлочунга ца кхайкаш, моллагӀа тайпара хатар хиннадале а хоаттаме оттаве аьттув боацача лоалахочунга, гаргарча сагага кхайк. Шоай ӀаьдалагӀа хӀама ца доаде гӀерт уж, бакъда дуккха дукхагӀа дов цар, иштта никъ лелабеш хилча. Нах дӀакхетабе гӀерт тхо, нагахьа чура газ дӀаараозаш дола гӀирсаш болх беш дале, цхьаккха хатар хургдоацилгах. ХьаӀайна газ цо хьалъараоз», - дийцар тхога МЧС болхлочо.
