Бокъо йоацаш коача газ йохкаш хиннар бехктокхаме озаргва
Углеводородни оала газ бокъо йоацаш йохкаш хинна вай мехкара вахархо бехктокхаме озаргва ӏаьдало. Из хоам «Сердалога» бера МВД болхлошкара. Юрта а цу юрта бахаш болча бахархошта а кхераме долчча тайпара газ йохкаш хинначун гӏулакх тохкаш хилар Шолжа кхален прокуратура.
«Тохкама болхлоша белгалдечох, Галашка вахаш вола саг цхьаккха тайпара кхерамзлен хьал лорадеш воацаш, е из гӏулакх дӏадахьа бокъо луш дола каьхат доацаш, пропан газ йохкаш хиннав машинашка газ чуювттача станце», - дийцар тхога прокуратура болхлоша.
Полице болхлоша укх шера саькура бетта из гӏулакх тохкаш «Лада приора» машина чу цу АГЗС 200 сомах газ чуеттар. Из моттиг бахархошта, юрта боккха кхерам тӏалоаттабеш хиннилга белгалдир ӏаьдала болхлоша. Ма дарра аьлча, газ эккха, доккха хатар хила йиш йолаш хиннад цигара хьал. Шолжа кхален суде тохкаш латт из гӏулакх тахан.
