ГӀалгӀайче 2023 шера 8 эзар гаргга бер даьд
ГӀалгӀайчен кулгалхочо Келаматанаькъан Махьмуд-Ӏаьлас, ший телеграм-канале гӀолла, дийцар 2023 шера бераш даь хиларах лаьца. ДӀадахача шера вай республике 7 910 бер даьд. Царех 75 шола даь да, цкъара кхо бер даь а цхьа моттиг нийсъелар. КӀаьнкаш баьб 4 072, йиӀигаш – 3 838. ГӀалгӀайче дӀадахача 2023 шера итт бетта кхоалагӀа моттиг дӀалоацаш я Российски Федераце гӀолла бераш дара хьал хьаийцача, из дика дегӀадоагӀаш хилара хьокхам ба, - аьлар «Сердало» газетага ГӀалгӀай Республикан паччахьалкхен зарбан болх лелабераша.
Россе президента Путин Владимира терко лоаттаю къаман политиканна, цун керттердар да нах дукхагӀа бебаш хилийтар.
Президента луш дола социальни ахчаш дика накъадоалш хилар гуш да, цар наьха вахара хьал аттача доаккх, дезалхо малхаваккха а из хьалкхеве а новкъостал хул царех.
Федеральни центро массахана терко лоаттаю мехка керда берий бешамаш, ишколаш хьалъяра, берашта дикал йолаш кхетам балара, уж лерттӀа дегӀадоаладара.
Бераш, мехка Кулгалхочо яхачох, вай керттера рузкъа да, царга хьежаш я вай кхоане. Из гуш да ГӀалгӀайчен дегӀаахарца дувзаденна дешаш кхоачашдеш хиларга гIолла.
Белгалду, 2022 шера кIаьнкаш дукхагӀа баьбар йиӀигел. 2022 шера 15,3 хул из 1000 саг вахача юртара хьал дӀалаьрхӀача, хӀаьта карарча пхе бетта - 11,3 да.
Российски Федераце 2018 шера маьтсела бетта ворхӀлагӀча дийнахьа арадаьннача № 204 амарах, «ГӀалгӀай Республикан доазон тӀа бераш дар ахчанца хьаллоацаш» йола моттигера проект дика кхоачашъеш я, из чуйоагӀаш я «ДегӀаахар» яхача къаман проекта.
Вахаре эша новкъостал деш, бераш долча дезала 2022 шера дӀаденнад 837,6 млн сом.
