«Каьхат» яхача фильма дIахора доакъош доахаргда Санкт-Петербурге
ГӀалгӀайчен кино доаккхаш йола тоаба Санкт-Петербурге болх бе яхай. ГӀалгӀай паччахьалкхен 100 шу дузаш, киностуде «Каьхат» яха фильм йистедоаккхаш да. Цунца го йиш хургья, Сталина гӀалгӀай мехкахбаьхача халача ханашка нийсденнар.
ГӀалгӀай къаман киностуде кулгалхочочун, балха говзал йолча режиссёра Ӏамарханаькъан Амура кхетаче хилар Къилбаседа-Малхбузен федеральни куран тIарча массазарча викалашца, республикан кагирхой комитета болхлошца.
«Кхетаче дӀахьош, Ӏамарханаькъан Амура дийцар кино доаккхаш шийна нийслуча халонех, иштта ерригача фильм доаккхача тоабан, йовхьамаш ловзаерий балхах. Кхетаче гулбеннараш цецбаьнна бар, селлара дика из болх бе цун вӀаштӀехьадаларах, цар белгалдир, шоаш хьежа сюжет боккъонца хиннар дувцаш йолга, цу тӀа Россе дукхача моттигашка, кхыметтел советски ханашка хиннача мехкашка ухаш, чӀоагӀа болх баь хилар», - аьлар «Сердало» газетага ГӀалгӀайчен миннаце.
Санкт-Петербург кино даккхара цаховш хержаяц. Ӏамарханаькъан Амура фильм доаккхача тоабо укхаза 70 шерашка хиннар дувцара геттара дика йоагӀаш йола моттиг лехаяр, цудухьа цига доах цхьадола доакъош. Столицан къилбаседа оагӀорахьа цу фильман тӀеххьара доакъош доахаргда. Цо таро хулийтаргья хьажархой, дӀаяхача ханашка хинна вахар го.
