УнахцӀена нах- унахцӀена къам
Ужахьанаькъан Мурад Ачалкхен даькъ тӀарча дарбанчен керттера лор ва. Ший балха никъ цо дӀаболабир Ростоверча паччахьалкхен университета «Дарбан гӀулакх» яха говзал караерзаяьчул тӀехьагӀа, цига рентгенаца, узеца, тамографеца белх бе Iомалуш ординатура а яьккхар цо. 2018 шера денз Илдарха-Гӏалан кизга увттадеча даькъа кулгалхо хул цох. 2022 шера денз, цо кулгал ду Юкъерча Ачалкхен дарбанченна.
Белгалде деза, «Ачалкхен дарбанче» я Юкъерча Ачалкхен даькъ тӀа. Из хьалъяьй 1927 шера. Гӏишло шин даькъах латт, цу чу я амбулатори, терапевтий балха моттиг, берий лораш, царгий лорий кабинет, администраци.
«АУБ» ГБУЗ даькъ тӀа я 30 маьнги латташ йола наха дарбаш ду моттиг, иштта амбулатори, цун таро я дийнахьа 100 саг тӀаэца.
Дарбанче улл хозача, паргӀатача моттиге, бакъда цун хьалаш тишлуш доагӀа. Цудухьа, къаман проекта чудоагӀаш, 2026 шера цу моттиге диазза вӀаштIара яь гӀишло хьалъе лерхӀ, цо таро хулийтаргья наха дикагӀа дарба де.
Лора яхачох, ший а ший гаргарча наьха а могашал лорае еза.
-Кердача ноахало кхетаду, къона волча хана денз, могашал лорае езилга, лазарах кӀалвисарга ца а хьежаш.
Ший ханнахьа лорашка чакхвоалаш хила веза, хӀанз хало йолаш хӀама дац, «Госуслуги» яхача даькъа гIонца лора тӀаваха йиш я. АргӀанара саг чакхваларга хьежаш ха йоае а езац. Цхьаькха лоархӀаме моттиг я, вакцинаци яр, - аьлар цо.
Мурада яхачох, нах каст-каста тешаш ба къамаьлех, уж кхер шоай берашта маьхий тоха, бакъда цар кхетаде деза, маьхий тохаро лазар дӀахо дӀадаржийтац.
«УнахцӀена нах - унахцӀена къам! Ший вахар наха дарба дара хетадаьча сага кхетаду, из мел лоархӀаме да. Къаьстта цу тайпара хила еза унахцIенонцара уйла», - аьлар Ужахьанаькъан Мурада.
