Юкъарча палата кулгалхочо, конференци хьаеллаш белгалдир, вай къаман лораш шоай белха тIехьа дикка гаьна баьнналга, кхы дIахо а дуккхача оагIонашта тIехьа къахьега лаьрхIа болга. УнахцIенон министерства кулгалхочо яхачох, хьалхашка лаьттача халонашка хьежжа доацаш, шоай говзала тIехьа гаьнабала аьттув хиннаб вай лорий. «Из деррига а, шоай болх дукхабезаш дIахьоча лорий къахьегам ба. СалоIам боацаш болх баьб вай лораша. Тахан, вай гIулакх дикача оагIорахьа тоалуш латт», — аьлар Балай Мухьмад-Башира.

ДIахо, конференце дийцар керттерадараш. Царех дар ковидаца, тубуркулезаца дувзаденнараш. Фтизиопульмонологех болча кхуврча кулгалдеча Лоалахой Мадинас дийцар, таханарча дийнахьа, тубуркулез яхача лазара духьала шоаш лоаттадеча дарбах. Коронавирусни инфекцен духьала лоаттабеча тIемах дийцар, Шолжа-пхьерча, керттерча дарбанчен кулгалхо йолча Кокурхой Фатимас, МагIалбикерча дарбанче болх беча Сампенаькъан Лиляс. Лораша дийцар, цхьа барт болаш тIатеIIа дIахьоча белхо мара унахцIенон хьал тоадергдоацалгах.