Пятигорске дIайихьача «ТАСС. Десант» яхача цу йоккхача кхетаче чубоагIаш хиннараш дукха бар. «Машук» яхача кхетама оагIон доазон тIа дIадихьар из вIашагIкхетар. Проекте гулбеннабар цхьан мугIаре къахьегаш хьабоагIа болхлой — керттера редактораш, журналисташ, СКФО журналистиках йолча факультеташкара хьехархой, тайп-тайпарча болх-моттигашкара пресс-секретареш. Иштта йокххеи, кIоаргеи хьалхара дIахьош яр из кхетаче.

Гулбеннарашка моаршал хоатташ къамаьл дир Ставрополерча губернатора Владимиров Владимира. — Проекта керттера декхар - Ставрополера, ерригача Къилбаседа Кавказера кхоллама балхаца къахьегаш хьабоагIа нах вIашкаозар, царна цхьацца кердадараш довзийтар. Тахан латтача хана из геттара эшаш да.

ХIана аьлча, журналиста бе доал вай мехках, дерригача дуненах дола бакъдар. Аьттув болаш хилба шун никъ! Оашош хьаийца гIулакх дIахо а дукхадезаш, лоархIаш дIадаха низ хилба шун, — аьлар цо. Хозача дешашца йист хилар кхетаче ТАСС генеральни кулгалхо вола Михайлов Сергей:

— «ТАСС. Десант» аьнна оаха укх кхетачен цIи тиллар ший бахьан долаш да. Ишттача формате тахан хьалхара гуллуш да тхо. Массехк тайпарча болх-моттигашкара къахьегамхой ба укхаза тIабийхараш.

Дуккхача шерашка болх беш цар Iоадаьр, Iомадаьр шоай белха тIа шоана накъадаргхиларах дог тийша ва со, — аьлар Михайлов Сергейс. ЦIихезача боккхача журналисташа, эксперташа мастер-классаш дIакхухьаш, шоай балхацара говзал йовзийташ, керттерадараш белгалдеш дIадахар вIашагIкхетар.

Наха юкъе нийса кхетам боаржабара юкъе журналисташа дIахьу болх лакхача боараме хилар мелла лоархIаме да хьоахадир кхетаче. Тахан латтача хана кердадараш юкъе кхувлаш мишта дIабахьа йиш я кхоллама наьха шоай болх дийцар боккхача журналисташа