«Iана замагIа лоаттаеш йола чот, из чарахьал ду оакхарий а оалхазараш а тIакхетара хьал да. Из болх дIабахьара лоархIамедар да, дикка лоа уллаш хилар», — аьлар ГIалгIай Республикерча Iалам лорадераша.

Лоа уллаш хилча, еррига лараш гучахьа хул. Из болх дIахьош бараша ден-бус нийсъенна лараш дагаръю, цу юкъе керда оакхарий е оалхазар даьннадий хьожаш, цигара ховш хул цар хьал а. Иштта тохкаш долча доккхийча хьайбашта юкъе саьрч, лийгаш, акха хьакхарч хул; оакхарашта юкъе — бертий, цогалаш, акха цискаш, гIибухера чарч, пхьагалаш, кунеш.

Из дIа мел хьоча хана, маршрут дикка шозза Iомаю, хьалхарча даькъе дIайоаю еррига цар йита лараш, цул тIехьагIа, ди-бийса даьлча, кердаяраш белгалъю.

ХьунагIа мел дола дийна хIама дагардаьчул тIехьагIа, царна ше-ший белгалонаш ергья. Бекарга бутт юкъекхоачаш, цунах бола беррига хоам ховш хургба: масса тайпара оакхарий а оалхазараш а вай хьунагIа да.

Кийчбаьчул тIехьагIа, из болх дIабохьийтаргба федеральни чарахьала боахам дегIабара йолча Центре.