Малашб ца ховча нахагара хӀамаш ма ийе, яхаш, кхайкарал ду бахархошка
28.11.2023 10:03
Интернета оагӀонашка гӀолла хӀамаш йохкаш багӀача, малашб ца ховча нахах ма теша, царца бувзаме ма дувла, яхаш, кхайкарал ду МВД болхлоша республикан бахархошка. Из хоам «Сердало» газетага бир цигарча болхлоша.
«Интернета оагӀонашка багӀача нахагара хӀама эца отте, цар Ӏехабу бахархой. МВД болхлоша массехказа кхайкадаьд, маьха чухьнахьа хӀама йохкаш да тхо яхача нахага ла ма дувгӀа, царга шоаш Ӏеха ма дайта, яхаш. Шоай карта номераш, телефона номер цу нахага дӀа ма ювца! Бовзаш боацача нахага ахча дӀа ма ахийта!» - белгалдир полице болхлоша.
Нагахьа иштта тийшаболх шоашта хиннабале, Ӏалаьмате чехка дӀатӀагӀо Ӏаьдала. Оаш сихагӀа Ӏаьдал оарцагӀа мел доаккх, сихагӀа гучабаха тарлу зуламхой.
