ХьажцӀа болхараша шоай каьхаташ кийчде деза, гаьна ца доахаш
Укх бетта 25-ча денга кхаччалца, шоай каьхаташта кийчо е йиш йолаш ба ХьажцӀа болхараш. ООО «ИНГ-ХАДЖ» яхача оагӀоно тӀахьожам беш, дӀахьош ба из беррига болх. Белгалде деза, цига баха лаьрхӀараша гаьна ца доахаш, шоай ханнахьа каьхаташта кийчо е езилга.
«Укх шера, 10 шу ха йолаш дола доазол дехьавала бокъо лу биометрически паспорташ долчар мара аьттув бац, Саудовски Араве баха. Электронни визаш кийчъеш, сагага ший каьхаташ хила деза. Хадж-визашка гӀолла мара дӀачубитац болхараш цу мехка. Туристически визашца цига баха гӀертарашта гӀо дехаргдолаш да.
Оттаяь бокъонаш лораеш мара, чакхдала йиш яц из гӀулакх. Из деррига сел чӀоагӀа лорадара бахьан да, цига тӀалатташ бола нах сов дукха хилар, кхерамзлен хьал лорадар», - белгалдир ший телеграм-оагӀон тӀа вай мехкадас Келаматанаькъан Махьмуд-Ӏаьлас. Вай мехкара цига ваха бокъо я аьнна белгалваьраш 600 саг ва.
Керттерча декхарех да, хьажол де болхарашта эшаш дар Ӏалашдар, наькъа бахар, Ӏеш бола моттигаш хало йоацаш хилар, де мел деза гӀулакх деш лорашка чакхбалар.
