«ГӀалгӀайчен Кулгалхочо баркал аьлар Палестина бахархой дагалаьца хьа мел баьхкарашта, тахан хало кхаьча диса из къам хьаллаьцарашта. Гуманитарни новкъостал, иштта вай деш дола дуӀа - из керттера да, тахан вай де йиш йолчох. Вай Республика цӀаккха а юстара юсаргьяц, эшача новкъостал ца деш, вай массайолча хана хиннад цунна кийча», - йоах хоамо. Келаматанаькъан Махьмуд-Ӏаьлас белгалдир, из вай деш дола новкъостал хинна Ӏац, из вай халкъашта юкъера бехктокхам ба. Вай исторега, культурага хьежжа, вай новкъостал де дезаш да, кӀалвисар хьаллаца везаш да. Цо таро хулийтаргья Палестина гуманитарни хьал тоадарал совгӀа, кӀеззига мукъагӀа наьха сатеде а. Цу дикача гӀулакха юкъе дакъа мел лаьцарашта баркал хилда, Дала маьлехь долда цар сагӀа.