Гӏалгӏайчен яхархочоа суд ергья, дезала гӏулакх къоастадеш харцо ювцарах
Гӏалгӏайче гӏолла йолча СКР СУ Магӏалбик-Шахьара Тохкама даькъо чакхдаьккхар 25 шу даьннача моттигерча яхархочоа карагӏъяьннача харцон духьалара уголовни гӏулакх. Из бехке ю Россе УК 1 д. 303 ст. чудоагӏа зулам дарах. Цун бахьан да, граждански гӏулакх тохкача хана цо харцахьа тешал даь хилар.
«Тохкама болх дӏахьочар яхачох, дӏадахача шера оагӏой бетта, ший цӏен-даьцара къасташ, цунгара алименташ хьадоахаш, бер мичахьа хургда яха хаттар къоастадеш хинна граждански гӏулакх дӏахьош из дакъа лоацаш яр, цо ший хиннача цӏен-даь цӏерах долаш санна дехар чуделар. Цу тӏа дар, ше тӏавоацаш из гӏулакх тахкара пурам лу, аьнна. Из каьхат цо хьадера суде, цул тӏехьагӏа из материалашта юкъедаьлар; иштта, судо ший хоадам беча хана, дӏа а лаьрхӏар», - аьлар «Сердало» газетага Гӏалгӏайчен Тохкама комитете.
Тохкамхоша беррига лоткъам эцара болх дӏабихьаб, иштта тешал деш йола чӏоагӏа кӏийле а яьй. Цул совгӏа, из дехар яздаь кулг довзара экспертизо ший болх а бир. Карарча хана уголовни гӏулакх дӏадахьийтад суда оагӏонга, цун тӏеххьара хоадам бе.
