Интернете гӏолла тийшаболх лелабеча зуламхоша ӏехайир Наьсарера яхархо
Наьсарера яхархо ӏехаяьча, интернете гӏолла тийшаболх кхестабеча зуламхошта духьала РФ УК 2-ча оагӏон 159 ст. гӏулакх хьадийллар вай мехкарча Россе ОМВД болхлоша. ӏехаяь ахча дихьад ший, аьнна, латкъа ера из ӏаьдала болхлошка. Цо белгалдечох, «WhatsApp» мессенджере гӏолла бувзаме баьнна, 15 эзар сом даккха аьттув болча цхьан гӏулакха юкъе дакъа лаца аьннад цар мехкахочунга. Дакъа лоацаш хилча 520 сом хьатӏадайта деза аьнна хьалхадаьккхад.
Цар дийха ахча ший банковски карта тӏара дӏатӏатессад кхалсага, бакъда гӏулакх цу тӏа сецадац. 520 сом шийга хьакхаьчадац, 2 040 сом хьатасса аьннад зуламхочо, тӏаккха банковски балхаца цхьа кхоачамбоацараш нийсденнад, аьнна, ӏехаяь кхы а 3 264 сом, цул тӏехьагӏа кхы а 5 812 сом хьатӏатассийтад цунга. Деррига а дӏалаьрхӏача 11 636 сом ахча да цо, вӏалла ше леладечун уйла ца еш, малашб ца ховча наха дӏатӏатессар.
МВД болхлоша даггара кхайкарал деш латт бахархошка; боккъал а ма ледайта шоаш зуламхошка, бовзаш боацача наха ахчаш дӏатӏа ма тувса, оашош деча хӏаман кӏеззига мукъагӏа уйла еш хила, яхаш.
