Магасерча 10-ча микрорайоне, шоай доалахьа цӀенош дарий цхьанкхетар кхолла лаьрхӀар
Магасерча администраце гулбенна хилар, шахьарерча 10-ча микрорайонера бахархой. Дувца оттадаь керттера дош дувзаденна дар ТСЖ хьакхолларца, хӀана аьлча из цахиларах дуккха кхоачамбоацараш нийслу шахьаре. Из хоам «Сердало» газетага бир шахьара администраце болхлоша.
«Бахархошкара каст-каста дехараш кхоач тхога, цу мугӀарера болх тоабе, аьле. ВӀаштӀара даьча цӀеной гӀулакх боаггӀача боараме дӀагӀоргдолаш, геттара эшаш оагӀув ба из. Бахархоша мел дувцачунга ладийгӀа, дуккхача хӀамай зем баьккхар оаха. Белгалде деза, администраце болхлойи, бахархойи цхьана болаш, бувзам лелабеш мара из гӀулакх ма хетта дӀагӀоргдоацилга. ДикагӀа долча хьалага кхоачаргда вай, цхьа барт болаш, из оагӀув хьаллоацаш хуле», - аьлар шахьара да волча Орцханаькъан Зайта.
Шахьарерча моттигий, бераш гуллуш долча спорта доазоний санитарни хьал лорадеш хила дезилгах хьоахадир цига. Квартираш йолча цӀеношка бахача наха хьалхадаьккхар, эггара хьалхарча аргӀагӀа, тоае еза шахьарера моттигаш белгалъеча, дакъа лоацаш хила, аьнна.
