15,5 шу деза вай мехкахошта цхьа миллион ахча Ӏоаде
Юкъерча боарам тӀа латтача алапе тӀара 10% ахча дӀадехкаш хилча, 15,5 шу ха еза вай мехкарча бахархошта, цхьа миллион рузкъа Ӏоаде. ЛаьрххӀа дӀабихьача тохкама балхо гучадаьккхар из.
«РИА хоамаш яхача оагӀоно ше дӀабихьача балхах яздечунга хьежача; Чукотке, Ямало-Ненецки автономни кураш тӀа, Магадане бахача наьха аьттув ба, кхычахьа бахача нахал сихагӀа миллион Ӏоаде», - йоах цох дувцача оагӀон тӀа.
ХӀаьта, ГӀалгӀай мехкарча бахархошта, юкъерча боарам тӀа латта алапи теркалдича, кхозза дукхагӀа ха (15, 5 шу) эш миллион Ӏоаде.
«Къилбаседа Кавказа чудоагӀача мехкий алапеш лакха цахиларах, лохагӀча лагӀа тӀа отт уж цу гӀулакха юкъе», - йоах из дош техкараша.
Из гӀулакх довзаш болча болхлоша яхачох, Къилбаседа Кавказе боккхий дезалаш ба, болх боацаш лела нах дукха ба. Из гӀулакх аттачахьа даккха, вахара - экономически хьал айде деза.
