Даьхенцара безам кхебеча боламе дакъа лацарах, майдилг елар журналиста
«Росси» яхача патриотически боламе дакъа лоацаш хиларах, майдилг елар тха болхлочунна, цӀихезача гӀалгӀай журналиста ГӀазданаькъан Ахьмада, из хилар «Сийлахь-йоккхача Коталон Турпал» яхача Ерригроссийски, хӀара шера дӀахьош йолча литературан яхье дакъа лоацаш.
Карарча хана дӀахьош хинна «Сийлахь-йоккхача Коталон Турпал» яха яхь юбилейни яр. Из лаьрхӀа яр Россе бӀухошта карагӀдаьннар диццадалийтара. Кхелахошта хьалхашка мел нийсденна балхаш лоархӀаме дар, вай кхувш йоагӀача тӀехьенна Даьхенцара безам совбоаккхаш кхетам балара, бӀухошта-турпалхошта карагӀдаьнначох цар доаккхал дара, Россе тӀема-исторически тӀехьале лораяра», - аьлар яхь вӀашагӀъеллараша.
Вай начӀал долча «Сердало» газета журналиста, из дикагӀчарех цаӀ хилара тешал деш дола совгӀат денна яхь дӀахьош яр Россе йоазонхой Союзо, герзашцарча низий Министерствос, дешара Министерствос, Российски Федераце культуран Министерствос, иштта Российски паччахьалкхен библиотеко, Кепайоазон цӀено. ГӀазданаькъан Ахьмада цу яхье турпалхочох, атта боаца вахара никъ дӀахьош хиннача цӀихезача разведчиках, ГӀалгӀайчен вахархочох Цхьорой Ӏаддалах ше язъяь очерк йовзийтар.
